Хавар болоод сүүлийн үед ханиад томуу тусах нь ихэсч, эмнэлгээр нэг уйлалдсан хүүхдүүд, цухалдсан эцэг эхчүүд л байна.
Ажиглаад байхад үзүүлэхээр орж ирсэн хүүхэд бүр айсан дүрхтэй, ээж аав нь аргадсан, албадсан, аргаа барсан улсууд л байх юм.
Хүүхдээ эмнэлэг рүү авч явахаасаа өмнө хаашаа, яах гэж явж байгааг сайн тайлбарла. Тариулахаар юмуу вакцин хийлгэх гэж байгаа ч " яах ч үгүй" гэж худлаа хэлж болохгүй.Тэгвэл дараагийн удаа танд итгэхгүй, эмчийн өрөө рүү авч орох бүр л хэцүү болно.
Өдөр тутмын амьдралдаа хүүхдээ эмчээр бүү айлга. "Тариа хийлгэнэ шүү!,
Эмч дуудлаа шүү!" гээд байвал үнэхээр эмчид очих үед хүүхэд өөрийгөө шийтгүүлж байна гэж боддог. Уйлахгүй сайн эмчид үзүүлвэл сонирхлыг нь татсан зүйлээр урамшуулна гэдгийг амла. Энэ нь заавал чихэр, шоколад байх албагүй.Тоглоомын газар явах, зугаалах, юм үзүүлэх мэт байж болно.
Эмчийн өрөөний гадаа хүн ихтэй, хүлээх шаардлагатай үед хүүхдийг аль болох анхаарлыг өөр юманд сатааруулж,бусад уйлаад ч юмуу гарч ирэх хүүхдүүдийг анзааруулахгүй байхыг хичээгээрэй.
Эмчийн өрөөнд ороод ээж та өөрөө бүү сандарч тэвдээрэй.Ямар ч тохиолдолд тайван байж,хүүхдээ энгийн яриагаар магтаж, тайвшруулж байгаарай.Ээжийнхээ дууны өнгөнөөс хүүхэд бүгдийг ойлгодог.
Зарим хүүхдүүд эмчээс биш,өмссөн халатнаас айдаг.Энгийн үедээ гэртээ хааяа хүүхдүүдтэйгээ эмч болон тоглож,янз янзын мэргэжлийн хүмүүс өөр өөр дүрэмт хувцастайг тайлбарлаж байгаарай.
Хүн бүрийг заавал хүүхдээ аваад эмнэлэг яв гээгүй юм шүү. Энэ бол амьдралд тохиолддог асуудлуудын нэг учраас, хүүхэд тайван байвал эмч ч тайван үзлэг хийж, онош тогтооход ч хялбар байдаг юм шүү!

Эх сурвалж: Эндээс